Avansado.com | Admin

Xefe estadu Maior F-FDTL (FALINTIL-Forsa Defeza Timor Leste), Major Jeneral Lere Anan Timur, apela ba Organizasaun Non-Governo (NGO) Fundasaun Mahein ne’ebe simu osan husi Australia no Estadus Unidus Amerika, ne’e diak liu nonok, hodi la bele koalia ataka bei-beik F-FDTL, tanba F-FDTL ne’e hanesan lutu ba nasaun (GMNTV, 29/7/2020).

“Hau apela ba organizasaun sira, li-liu Mahein ne’ebe ataka bei-beik institusaun no ataka bei-beik hau, mas hau hatete ba nia katak loron ida forsa armada sei viola direitu humanu ho nia, lori ba tribunal hau maka responsabiliza, ou nia sai ka hasa’i tia nia organizasaun ne’e, nia ne’e saida? Hatama nia kanuru tohar ba forsa armada no ba militar nia asuntu, bele dehan militar ne’e ba ida baku ida ne’ebe ne’e loos, mas nia kuandu ataka hau no institusaun ne’e. Ita Timor ne’e Timor, ita laos ema estranjeiru. Depois ONG ida “Fundasaun Mahein” simu osan Australia ninian no Amerika nian seidauk to’o nonok, hakarak hatama tan kanuru tohar ba militar nia asuntu, ne’e Timor demokrasia la hanorin hanesan ne’e, lei tamba la iha ne’e, militar ne’e militar ninian, ema ida sivil la iha direitu no la iha kompetensia tan atu hatama o nia kanuru tohar, por ejemplu kestaun logistika ka administrasaun ka kilat ka saida ne’e, o kritika ne’e kritika ba baku ema, maibe fo evidensia la’os ba koalia iha media enkuantu nia komandante seidauk hatene”, Xefe Estadu Maior F_FDTL ne’e ba jurnalista sira, Kuarta (29/72020), iha Palasiu Presidensial Nicolau Lobato (GMNTV).

Relasiona ho deklarasaun Maior Jeneral Lere, aktivista media no mos direitus humanus, Virgilio Gueterres Bolale fo reposta liu nia akun facebook hanesan tuir mai ne’e:

1. Se Komando Geral FALINTIL-FDTL seidauk simu keixa konaba kazu nia membru baku ema sivil, sala la’os Fundasaun Mahein nian.

2. Se Fundasaun Mahein nia kritika iha tendensia atu halo ataka ba pessoa ulun-boot FALINTIL-FDTL nian, Komandante Geral, liu hosi Komando Geral, bele halo klarifikasaun ne’ebe ho kategoria pedagojika (hanorin), envez de halo ameasa ne’ebe la proporsional;

3. Monitorizasaun ba sistema no situasaun seguransa no defeza ne’e “area kobertura” Fundasaun Mahein nian duni nu’udar ONG. Tanba ne’e, bainhira sira kritika atuasaun membru FALINTIL-FDTL no PNTL ne’ebe viola kodigu profisional polisia no militar nian, ne’e sira nia tarefa primordial kedas. Ne’e la’os hatama “kanuru-tohar”, maibe sira nia “bikan han-fatin” kedas;

4. Simu osan hosi Australia ka Amerika, la iha relevansia ho intervensaun Fundasaun Mahein nian iha area defeza no seguransa. Estadu Timor-Leste mos simu apoiu finanseiru hosi rai-seluk. Rona katak Australia mos atu fo apoiu ro-ahi ba FALINTIL-FDTL hodi halo seguransa ba ita nia tasi.

5. Lakohi ukun-an iha pasadu, la automatikamente signifika la iha direitu atu partisipa iha prosesu dezenvolvimentu, mos la halakon ema nia dever atu servi rai no povu ida ne’e. Fundador Mahein ida, kompanheiru Nelson Belo, estudante ativista pro-independensia ida. Nia harii Fundasaun Mahein la’os atu “kontra ukun-rasik-an”, maibe atu halo check and balance ba utilizasaun no performa poder militar no polisia iha Estado de Direito Democratico nia laran;

6. RDTL ne’e Estado de Direito Democratico, iha ne’ebe poder civil (vontade popular) mak komanda poder sira seluk. Tan ne’e, ameasa no haruka Fundasaun Mahein atu “nonok” laiha kabimentu politiku ida. Maun boot sira, inklui maun Lere Anan Timur, mak uluk hanorin katak “politika mak manda fujil”, la’os “fujil mak manda politika.” Justru iha demokrasia, militar sira mak tenki nonok barak liu. Militar sira bele koalia barak liu bainhira iha ‘Estado de Sitio’ ka “Estado de emergensia” ne’ebe Prezidente da Republika nu’edar Comandante Supremo das Forcas Armadas, deklara. Maun Taur Matan Ruak, iha 2007 hateten ba hau ho kompanheiru na’in 2 (Russuo Fonseca ho Deo Amaral Carvalho) iha Tasi-tolu: “Komandante nia tarefa mak fo komando, la’os atu halo komentar.”

7. Los duni katak la bele iha sidadaun (ema sivil) ida baku membru FALINTIL-FDTL no PNTL. Loos mos, no loos liutan katak membru FALINTIL-FDTL no PNTL labele tau liman (baku) sidadaun ida. Prezensa membru FALINTIL-FDTL no PNTL nian iha povu nia leet tenki halo povu sente “seguru no honradu” liu tan, hanesan uluk povu haree prezensa FALINTIL nian durante periudu rezistensia.

8. Halo deklarasaun iha televizaun hodi ameasa sidadaun (ONG) no liafuan “atu viola nia direitu humanu”, la’os deklarasaun nebe halo povu sai seguru no sente honradu;

9. Tempo ona atu ita nia Komando Geral FALINTIL-FDTL no PNTL iha Gabinete de Informação ho nia Porta-Voz rasik hodi hataan ba reasaun no apresiasaun kritika hosi publiku nian konaba lala’o militar no polisia nian.

10. Hanesan mos independensia ne’ebe ita hetan tanba luta koletiva (popular) ita hotu nian, nune’e mos iha prosesu atu konsolida independensia hodi harii Estado de Direito Demoratico, ita hotu tenki hamutuk. Hamutuk tau-matan ba malu, koriji malu no hanorin malu. Ameasa la’os maneira diak atu koriji no hanorin malu.

Bom fim de semana, A LUTA CONTINUA! (Avansado-01)

—-

By admin

Tinggalkan Balasan

Alamat email Anda tidak akan dipublikasikan. Ruas yang wajib ditandai *